Күндү үөрэнээччилэр, педагогтар, төрөппүттэр!

     
      Улуустааҕы үөрэҕирии салалтатын аатыттан барытыгын Билии күнүнэн итиитик-истиҥник эҕэрдэлиибин!

    Балаҕан ыйын 1 күнэ – ураты бырааһынньык. Бу күн биһиги кырачааннарбыт оскуола боруогун атыыллаан аан бастаан чуораан тыаһын истиэхтэрэ. Онтон выпускниктарбытыгар эппиэтинэстээх үөрэх дьыла саҕаланар.

Быйыл Мэҥэ- Хаҥалас улууһугар 36 оскуолаҕа 6102 үөрэнээччи үөрэниэҕэ. Ол иһиттэн 590 оҕо маҥнайгы кылааска киириэхтэрэ. Кинилэри билии- көрүү аартыгынан олохторун оскуолаҕа анаабыт уопуттаах учууталлар уонна кинилэр эдэр коллегалара арыаллыахтара. Ааспыт үөрэх дьыла, төһө да ураты усулуобуйаҕа аастар, биһиги улууспутугар ситиһиилээхтик түмүктэммитэ. Үөрэнээччилэрбит  предметнэй олимпиадаларга, научнай- практическай конференцияларга, айар конкурстарга уонна спортивнай күрэхтэһиилэргэ кыайыыларынан биһигини элбэхтик үөртүлэр.

Күндү үөрэнээччилэр!

     Үүммүт үөрэх дьыла эһиэхэ үгүс саҥа билиини, доҕотторгут истиҥ сыһыаннарын, оскуола олоҕун араас хайысхаларыгар ситиһиилэри, үрдүк үөрүүнү бэлэхтээтин! Выпускниктарбытыгар үөрэх дьыла таһаарыылаах буоллун, биир кэлим эксээмэннэргэ үчүгэй бэлэмнээх тиийин. Эһиги инники олоххут бэйэҕит илиигитигэр баарын өрүү өйдөөн кэскиллээх былааннарда оҥостун. Дойдугутугар, дьоннутугар туһалаах дьон буоларгытыгар биһиги эрэллээхпит.

Күндү төрөппүттэр, коллегалар!

      Эһиэхэ тус бэйэҕитигэр уонна дьиэ кэргэҥҥитигэр чэгиэн туругу, тулууру, дьулууру баҕарабын. Тапталлаах оҕолоргутун кытта кэккэлэһэ хаамсан иннигит диэки эрэллээхтик хардыылаан. Эһигини оҕолоргут, иитиллээччилэргит, үөрэнээччилэргит ситиһиилэринэн үөрдэ турдуннар.

Бырааһынньыгынан!

Саҥа үөрэх дьылынан!

Саҥа үөрэх дьылыгар саҥа арыйыылары, саҥа үрдэллэри!